ഭൂമിയുടെ ശ്വാസകോശത്തിന് വേദനിക്കുന്നു

ഭൂമിയുടെ ശ്വാസകോശത്തിന് വേദനിക്കുന്നു; ആമസോണ്‍ മഴക്കാടുകള്‍
അപകടകരമായ അവസ്ഥയിലേക്ക്

ഭൂമിയുടെ ശ്വാസകോശമാണ് കാടുകള്‍. പ്രകൃതിയെ ഇന്നും ഇങ്ങനെയൊക്കെ നിലനിര്‍ത്തുന്നുണ്ടെങ്കില്‍ കാടുകളുടെ സാന്നിധ്യം തന്നെയാണ് പ്രധാന പങ്കു വഹിക്കുന്നതും.അതുകൊണ്ടു തന്നെ മനുഷ്യന്‍ ഇന്നും ഭൂമിയില്‍ ജീവിക്കുന്നതിന്റെ ക്രെഡിറ്റും മരങ്ങള്‍ക്കും കാടുകള്‍ക്കും കൂടി അവകാശപ്പെട്ടതാണ്. കാര്‍ബണ്‍ ഡൈ ഓക്സൈഡിനെ വലിച്ചെടുത്ത് ഓക്സിജന്‍ പുറത്തു വിടുന്നു എന്നതിലുപരിയായി പ്രകൃതിയുടെ സന്തുലിതാവസ്ഥ സംരക്ഷിക്കുന്നതിലും കാടുകളുടെ പങ്ക് നിസ്തുലമാണ്. നമ്മുടെ ഭൂമിയുടെ 31 ശതമാനവും കാടുകളാണ്. അതായത് ആകെ വിസ്തൃതിയില്‍ 4.06 ബില്യണ്‍ ഹെക്ടര്‍ സ്ഥലമാണ് കാടിനായുള്ളത്.
എന്നാല്‍, ആമസോണ്‍ മഴക്കാടുകള്‍ മരങ്ങള്‍ കൂട്ടത്തോടെ നശിക്കുന്ന ഏറ്റവും അപകടകരമായ അവസ്ഥയിലേക്ക് നീങ്ങുകയാണെന്ന് ഗവേഷകര്‍. വരള്‍ച്ച, തീ, വനനശീകരണം എന്നിവ മൂലമുണ്ടാകുന്ന നാശനഷ്ടങ്ങളില്‍ നിന്ന് കരകയറാനുള്ള കഴിവ് ലോകത്തിലെ ഏറ്റവും വലിയ മഴക്കാടുകള്‍ക്ക് നഷ്ടമാകുന്നതായും ഒരു പഠനം സൂചിപ്പിക്കുന്നു.
വായുവില്‍ നിന്ന് കാര്‍ബണ്‍ ഡൈ ഓക്സൈഡ് വലിച്ചെടുക്കുന്നതില്‍ ഉഷ്ണമേഖലാ വനങ്ങളെ അപേക്ഷിച്ച് വളരെ കുറച്ച് കാര്യക്ഷമത മാത്രമുള്ള വനങ്ങള്‍ മാത്രമായി ഇത് മാറിയേക്കാം എന്നും ഇതെല്ലാം ആഗോളതാപനത്തിന് കാരണമായിത്തീര്‍ന്നേക്കാം എന്നും പഠനം പറയുന്നു. അതേസമയം, ആമസോണിന്റെ ഭാഗങ്ങള്‍ ഇപ്പോള്‍ ആഗിരണം ചെയ്യാന്‍ കഴിയുന്നതിനേക്കാള്‍ കൂടുതല്‍ കാര്‍ബണ്‍ ഡൈ ഓക്സൈഡ് പുറന്തള്ളുന്നതായി മുന്‍ പഠനങ്ങള്‍ തെളിയിച്ചിട്ടുണ്ട്.
‘മരങ്ങള്‍ക്ക് ആരോഗ്യം നഷ്ടപ്പെടുന്നു, അവ ഒരു പ്രധാന ഘട്ടത്തിലേക്ക് നീങ്ങുകയാണ്. അടിസ്ഥാനപരമായി, മരങ്ങള്‍ കൂട്ടത്തോടെ നശിക്കുകയാണ്’ എന്ന് എക്‌സെറ്റര്‍ സര്‍വകലാശാലയിലെ ഡോ. ക്രിസ് ബോള്‍ട്ടണ്‍ പറഞ്ഞു. മൂന്ന് പതിറ്റാണ്ടിന്റെ സാറ്റലൈറ്റ് ഡാറ്റയെ അടിസ്ഥാനമാക്കിയുള്ള കണ്ടെത്തലുകളുടെ അടിസ്ഥാനത്തില്‍, ആമസോണ്‍ മഴക്കാടുകളുടെ ആരോഗ്യത്തിന്റെ കാര്യത്തില്‍ ഭയാനകമായ കാര്യങ്ങളാണ് സംഭവിക്കുന്നത് എന്നും ഗവേഷകര്‍ പറയുന്നു.
കാലാവസ്ഥാ വ്യതിയാനം, വനനശീകരണം, തീപിടിത്തം തുടങ്ങിയ മനുഷ്യരുണ്ടാക്കിയ ആഘാതം കാരണം ഉണ്ടാകുന്ന വരള്‍ച്ചയുടെ ഫലങ്ങളില്‍ നിന്ന് കരകയറാന്‍ മരങ്ങള്‍ കൂടുതല്‍ സമയമെടുക്കും. അതിനാല്‍, 75% വനങ്ങളിലും പ്രതിരോധശേഷി നഷ്ടപ്പെട്ടതിന്റെ സൂചനകളുണ്ട്.
അങ്ങനെ ഒരു അവസ്ഥയില്‍ എപ്പോള്‍ എത്തുമെന്ന് അറിയില്ലെങ്കിലും, കാലാവസ്ഥാ വ്യതിയാനത്തിനും ജൈവവൈവിധ്യത്തിനും പ്രാദേശിക സമൂഹത്തിനും അതുണ്ടാക്കുന്ന പ്രത്യാഘാതങ്ങള്‍ വിനാശകരമായിരിക്കും എന്നും ഗവേഷകര്‍ മുന്നറിയിപ്പ് നല്‍കുന്നു. ഈ പ്രക്രിയ ആരംഭിച്ചുകഴിഞ്ഞാല്‍, പതിറ്റാണ്ടുകള്‍ക്ക് ശേഷം പുല്‍മേടുകളും മരങ്ങളും ചേര്‍ന്ന വളരെ വ്യത്യസ്തമായ ആവാസവ്യവസ്ഥയിലേക്ക് ആമസോണിന്റെ പ്രധാനമായ ഒരു ഭാഗം  രൂപാന്തരപ്പെടുമെന്നും അവര്‍ പ്രവചിക്കുന്നു.
‘ആമസോണ്‍ ധാരാളം കാര്‍ബണ്‍ സംഭരിക്കുന്നു, അതെല്ലാം അന്തരീക്ഷത്തിലേക്ക് പുറന്തള്ളും. അത് താപനില വര്‍ദ്ധിപ്പിക്കുന്നതിന് കൂടുതല്‍ സംഭാവന നല്‍കും. ആഗോള ശരാശരി താപനിലയില്‍ ഭാവിയില്‍ സ്വാധീനം ചെലുത്തുകയും ചെയ്യും’ -ഡോ ബോള്‍ട്ടണ്‍ പറഞ്ഞു. വ്യാവസായികത്തിന് മുമ്പുള്ള നിലയുമായി താരതമ്യപ്പെടുത്തുമ്പോള്‍, മഴക്കാടുകളുടെ അഞ്ചിലൊന്ന് ഇതിനകം നഷ്ടപ്പെട്ടു എന്നും അവര്‍ പറഞ്ഞു.
യൂണിവേഴ്‌സിറ്റി ഓഫ് എക്‌സെറ്റര്‍, പോട്‌സ്ഡാം ഇന്‍സ്റ്റിറ്റ്യൂട്ട് ഫോര്‍ ക്ലൈമറ്റ് ഇംപാക്റ്റ് റിസര്‍ച്ച് (പിഐകെ), ടെക്‌നിക്കല്‍ യൂണിവേഴ്‌സിറ്റി ഓഫ് മ്യൂണിക്ക് എന്നിവ ചേര്‍ന്നാണ് ഗവേഷണം നടത്തിയത്. ‘വനനശീകരണവും കാലാവസ്ഥാ വ്യതിയാനവുമാണ് ഈ തകര്‍ച്ചയുടെ പ്രധാന പ്രേരകങ്ങള്‍’ പിഐകെയിലെയും മ്യൂണിക്കിലെ സാങ്കേതിക സര്‍വകലാശാലയിലെയും പ്രൊഫ. നിക്ലാസ് ബോയേഴ്സ് പറഞ്ഞു.
ലണ്ടനിലെ ഇംപീരിയല്‍ കോളേജിലെ ഗ്രന്ഥം ഇന്‍സ്റ്റിറ്റ്യൂട്ടിലെ ഡോ. ബോണി വാറിംഗ് അഭിപ്രായപ്പെടുന്നു: ‘കാലാവസ്ഥാ വ്യതിയാനവും,
ഉഷ്ണമേഖലാ വനങ്ങളിലെ മനുഷ്യചൂഷണവും ചേര്‍ന്നുണ്ടാക്കുന്ന സമ്മര്‍ദ്ദങ്ങള്‍ ലോകത്തിലെ ഏറ്റവും വലിയ മഴക്കാടുകളെ അപകടത്തിലാക്കുന്നു എന്നതിന്റെ ഇതുവരെ നിരവധി തെളിവുകള്‍ കണ്ടെത്തിയിട്ടുണ്ട്. അത് ഈ ഏറ്റവും പുതിയ കണ്ടെത്തലുകളുമായി പൊരുത്തപ്പെടുന്നതാണ്. 1991 മുതല്‍ 2016 വരെയുള്ള സാറ്റലൈറ്റ് ഡാറ്റയെ അടിസ്ഥാനമാക്കിയുള്ള ഈ കണ്ടെത്തലുകള്‍ നേച്ചര്‍ ക്ലൈമറ്റ് ചേഞ്ച് ജേണലില്‍ പ്രസിദ്ധീകരിച്ചിട്ടുണ്ട്.