ട്രംപിന്റെ ഗോൾഫ് കോഴ്‌സ് നവീകരണ പദ്ധതിക്ക് കോടതിയുടെ താൽക്കാലിക തടസ്സം; ചരിത്രപ്രധാന പാർക്ക് അടച്ചുപൂട്ടരുതെന്ന് ഉത്തരവ്

വാഷിങ്ടൺ: അമേരിക്കൻ പ്രസിഡന്റ് ഡൊണാൾഡ് ട്രംപിന്റെ നേതൃത്വത്തിൽ വാഷിങ്ടണിലെ ചരിത്രപ്രധാനമായ ഈസ്റ്റ് പൊട്ടോമാക് പാർക്കും ഗോൾഫ് കോഴ്‌സും നവീകരിക്കാനുള്ള പദ്ധതിക്ക് ഫെഡറൽ കോടതിയുടെ താൽക്കാലിക വിലക്ക്. പാർക്ക് പൊതുജനങ്ങൾക്കായി അടച്ചുപൂട്ടാനുള്ള ട്രംപ് ഭരണകൂടത്തിന്റെ നീക്കം യു.എസ്. ജില്ലാ ജഡ്ജി അന റെയ്സ് തടഞ്ഞു. നവംബർ 28 വരെയോ കോടതി കൂടുതൽ ഉത്തരവ് പുറപ്പെടുവിക്കുന്നതുവരെയോ പാർക്ക് പതിവ് സമയങ്ങളിൽ പൊതുജനങ്ങൾക്ക് തുറന്നുകൊടുക്കണമെന്നാണ് നിർദേശം.

പൊട്ടോമാക് നദിക്കരയിൽ സ്ഥിതിചെയ്യുന്ന ഈസ്റ്റ് പൊട്ടോമാക് ഗോൾഫ് ലിങ്ക്സ് 15 മാസത്തേക്ക് അടച്ചിട്ട് അന്താരാഷ്ട്ര നിലവാരത്തിലുള്ള ചാമ്പ്യൻഷിപ്പ് ഗോൾഫ് കോഴ്‌സായി മാറ്റാനായിരുന്നു ട്രംപിന്റെ പദ്ധതി. പ്രശസ്ത ഗോൾഫ് കോഴ്‌സ് ഡിസൈനർ ടോം ഫാസിയോയാണ് പുതിയ രൂപകൽപ്പനയ്ക്ക് നേതൃത്വം നൽകുന്നത്. നിലവിലുള്ള 36 ഹോളുകൾ മാറ്റി 18 ഹോളുകളുള്ള ആധുനിക കോഴ്‌സ് സ്ഥാപിക്കാനാണ് ലക്ഷ്യമിട്ടിരുന്നത്.

പാർക്കിന്റെ ചരിത്രപ്രാധാന്യവും പൊതുജനങ്ങൾക്കുള്ള പ്രാപ്യതയും നഷ്ടപ്പെടുമെന്നും നവീകരണത്തോടെ സാധാരണക്കാർക്ക് ഗോൾഫ് കളിക്കാനുള്ള അവസരം പരിമിതപ്പെടുമെന്നും ചൂണ്ടിക്കാട്ടി ഡിസി പ്രിസർവേഷൻ ലീഗും രണ്ട് പ്രാദേശിക ഗോൾഫ് കളിക്കാരുമാണ് കോടതിയെ സമീപിച്ചത്. ഫെബ്രുവരിയിൽ ആരംഭിച്ച നിയമപോരാട്ടത്തിന്റെ തുടർച്ചയായാണ് പുതിയ ഉത്തരവ്.

പാർക്ക് അടച്ചുപൂട്ടാൻ ഭരണകൂടം മുന്നോട്ടുവെച്ച സുരക്ഷാ കാരണങ്ങളും ജീവനക്കാരുടെ കുറവും യഥാർഥ ലക്ഷ്യം മറച്ചുവെക്കാനുള്ള ന്യായീകരണങ്ങളാണെന്ന് ജഡ്ജി നിരീക്ഷിച്ചു. നവീകരണ പദ്ധതി നടപ്പാക്കുന്നതിനായി പാർക്ക് അടച്ചുപൂട്ടാനുള്ള തീരുമാനം നേരത്തെ തന്നെ എടുത്തിരുന്നുവെന്ന് ട്രംപിന്റെ സമൂഹമാധ്യമ പോസ്റ്റുകളും വ്യക്തമാക്കുന്നതായി കോടതി വിലയിരുത്തി. ഫെഡറൽ നിയമങ്ങൾ പാലിക്കുന്നതിൽ ഭരണകൂടത്തിന് വീഴ്ചയുണ്ടായെന്നും കോടതി ചൂണ്ടിക്കാട്ടി.

കഴിഞ്ഞ മാസം പാർക്കിലെ 500ലധികം മരങ്ങൾ മുറിച്ചുനീക്കിയതും കേസിൽ വിവാദമായിരുന്നു. ഇതിനെത്തുടർന്ന് കൂടുതൽ മരങ്ങൾ മുറിക്കുന്നതിന് കോടതി നിയന്ത്രണം ഏർപ്പെടുത്തിയിരുന്നു. സർക്കാർ ഉദ്യോഗസ്ഥരും അഭിഭാഷകരും കോടതിയെ തെറ്റിദ്ധരിപ്പിച്ചിട്ടുണ്ടോയെന്ന് പരിശോധിക്കാൻ മുൻ യു.എസ്. അറ്റോർണി ജെസ്സി ലിയുവിനെ ചുമതലപ്പെടുത്താനും ജഡ്ജി നീക്കം നടത്തുന്നുണ്ട്.

കോടതി ഉത്തരവിനെതിരെ ട്രംപ് സമൂഹമാധ്യമങ്ങളിലൂടെ വിമർശനം ഉന്നയിച്ചു. വാഷിങ്ടൺ മേഖലയിലെ താമസക്കാർക്ക് നവീകരിച്ച ഗോൾഫ് കോഴ്‌സിൽ 50 ശതമാനം ഇളവ് നൽകുമെന്നും അദ്ദേഹം പ്രഖ്യാപിച്ചു. അതേസമയം, കോടതിയുടെ ഉത്തരവ് പുതിയ ഗോൾഫ് കോഴ്‌സിനായുള്ള ആസൂത്രണ പ്രവർത്തനങ്ങൾ തുടരുന്നതിന് തടസ്സമല്ലെന്ന് നീതിന്യായ വകുപ്പ് വ്യക്തമാക്കി.