അമേരിക്കൻ ഇടക്കാല തിരഞ്ഞെടുപ്പ്: ഡെമോക്രാറ്റിക് സ്ഥാനാർഥികളെ ലക്ഷ്യമിട്ട് എഐ വ്യാജവീഡിയോകൾ; റഷ്യൻ ബന്ധമെന്ന് സംശയം

വാഷിങ്ടൺ: അമേരിക്കയിലെ ഇടക്കാല തിരഞ്ഞെടുപ്പിന് മുന്നോടിയായി ഡെമോക്രാറ്റിക് സെനറ്റ് സ്ഥാനാർഥികളെ ലക്ഷ്യമിട്ട് റഷ്യയുമായി ബന്ധമുണ്ടെന്ന് സംശയിക്കുന്ന സംഘങ്ങൾ നിർമിച്ച എഐ വ്യാജവീഡിയോകൾ സമൂഹമാധ്യമങ്ങളിൽ പ്രചരിക്കുന്നു. സ്ഥാനാർഥികളെ അപകീർത്തിപ്പെടുത്തുന്ന തെറ്റായ ആരോപണങ്ങൾ പ്രചരിപ്പിക്കാനായി യഥാർഥ വ്യക്തികളുടെ പേരുകളും ചിത്രങ്ങളും ദുരുപയോഗം ചെയ്തതായാണ് റിപ്പോർട്ട്.

ഒഹായോയിൽ റിപ്പബ്ലിക്കൻ സ്ഥാനാർഥി ജോൺ ഹസ്റ്റഡിനെതിരെ മത്സരിക്കുന്ന ഡെമോക്രാറ്റിക് സ്ഥാനാർഥി ഷെറോഡ് ബ്രൗണിനെയും ടെക്സസിൽ കെൻ പാക്സ്റ്റണിനെതിരെ മത്സരിക്കുന്ന ജെയിംസ് തലാരിക്കോയെയുമാണ് വ്യാജവീഡിയോകൾ പ്രധാനമായും ലക്ഷ്യമിട്ടിരിക്കുന്നത്.

ബ്രൗണിന്റെ മുൻ ഇന്റേൺ ഹയ അക്ബിക്കിന്റെ ചിത്രമുപയോഗിച്ചുള്ള ഒരു വീഡിയോയിൽ, അവർ നടത്തിയെന്ന തരത്തിൽ വ്യാജ പ്രസ്താവനകൾ ഉൾപ്പെടുത്തിയിട്ടുണ്ട്. എന്നാൽ വീഡിയോയിലെ ആരോപണങ്ങൾ പൂർണമായും കെട്ടിച്ചമച്ചതാണെന്ന് അക്ബിക് വ്യക്തമാക്കി. തലാരിക്കോയുടെ മുൻ വിദ്യാർഥിയെന്ന രീതിയിൽ ഒരാൾ ആരോപണങ്ങൾ ഉന്നയിക്കുന്ന മറ്റൊരു വീഡിയോയും പ്രചരിച്ചു. ഈ വീഡിയോകൾ എഐ ഉപയോഗിച്ച് നിർമിക്കുകയോ മാറ്റം വരുത്തുകയോ ചെയ്തതാകാമെന്നാണ് വിദഗ്ധരുടെ വിലയിരുത്തൽ.

2024ലെ അമേരിക്കൻ തിരഞ്ഞെടുപ്പിനിടെ ഡെമോക്രാറ്റിക് നേതാക്കളായ കമല ഹാരിസിനെയും ടിം വാൾസിനെയും ലക്ഷ്യമിട്ട് പ്രചരിച്ച വ്യാജവീഡിയോകളുമായി പുതിയ ഉള്ളടക്കത്തിന് സാമ്യമുണ്ടെന്ന് ഗവേഷകർ ചൂണ്ടിക്കാട്ടുന്നു. ‘സ്റ്റോം-1516’ എന്നറിയപ്പെടുന്ന റഷ്യൻ ബന്ധമുള്ള തെറ്റായ വിവര പ്രചാരണ ശൃംഖലയുമായി ഇവയ്ക്ക് ബന്ധമുണ്ടാകാമെന്നാണ് വിദഗ്ധരുടെ സംശയം. എന്നാൽ വീഡിയോകളുടെ ഉറവിടം പൂർണമായി സ്ഥിരീകരിച്ചിട്ടില്ല. റഷ്യൻ എംബസി വിഷയത്തിൽ പ്രതികരിച്ചിട്ടില്ല.

വീഡിയോകൾ ആദ്യം പങ്കുവെച്ച ചില പോസ്റ്റുകൾ എക്സ് നീക്കം ചെയ്യുകയും അവ പ്രസിദ്ധീകരിച്ച അക്കൗണ്ടുകൾ സസ്‌പെൻഡ് ചെയ്യുകയും ചെയ്തു. എന്നാൽ അവയുടെ പകർപ്പുകൾ മറ്റ് അക്കൗണ്ടുകളിലൂടെ തുടർന്നും പ്രചരിക്കുന്നുണ്ട്. തിരഞ്ഞെടുപ്പിന്റെ അവസാനഘട്ടത്തിൽ എഐ ഉപയോഗിച്ച് വ്യാജവിവരങ്ങൾ സൃഷ്ടിച്ച് വോട്ടർമാരെ സ്വാധീനിക്കാനുള്ള ശ്രമങ്ങൾ വർധിക്കുന്നതായും വിദഗ്ധർ മുന്നറിയിപ്പ് നൽകുന്നു.