നാല് മണിക്കൂർ നീണ്ട അനിശ്ചിതത്വത്തിന് വിരാമം; അമേരിക്കയിൽ വിമാന സർവീസുകൾ പുനരാരംഭിച്ചു

വാഷിങ്ടൺ: സാങ്കേതിക തകരാറിനെത്തുടർന്ന് അമേരിക്കയിലുടനീളം നിർത്തിവെച്ച വിമാന സർവീസുകൾ പുനരാരംഭിച്ചു. ഫെഡറൽ ഏവിയേഷൻ അഡ്മിനിസ്ട്രേഷൻ (എഫ്എഎ) ഏർപ്പെടുത്തിയ രാജ്യവ്യാപക വിമാന നിയന്ത്രണം നാല് മണിക്കൂറിലേറെ നീണ്ടതിനുശേഷമാണ് പിൻവലിച്ചത്. ഇതോടെ വിമാനത്താവളങ്ങളിൽ കുടുങ്ങിയ യാത്രക്കാർക്ക് ആശ്വാസമായി.

വെള്ളിയാഴ്ചയാണ് രാജ്യത്തെ എല്ലാ വിമാനത്താവളങ്ങളിൽനിന്നുമുള്ള പുറപ്പെടൽ സർവീസുകൾ എഫ്എഎ താൽക്കാലികമായി നിർത്തിവെച്ചത്. രാജ്യത്തെ വിവിധ എയർ റൂട്ട് ട്രാഫിക് കൺട്രോൾ സെന്ററുകളെ ബാധിച്ച ആശയവിനിമയ ശൃംഖലയിലെ തകരാറാണ് പ്രതിസന്ധിക്ക് കാരണമായത്. യാത്രാവിമാനങ്ങളുടെ സുരക്ഷ ഉറപ്പാക്കുന്നതിനായി മുൻകരുതൽ നടപടിയായാണ് നിയന്ത്രണം ഏർപ്പെടുത്തിയതെന്ന് അധികൃതർ അറിയിച്ചു.

വൈകിട്ട് നാലുമണിയോടെയാണ് നിയന്ത്രണം ആരംഭിച്ചത്. രാത്രി 8.15ഓടെ നിയന്ത്രണം പിൻവലിച്ച് വിമാനങ്ങൾക്ക് പറന്നുയരാൻ അനുമതി നൽകി. എന്നാൽ സർവീസുകൾ സാധാരണ നിലയിലാകാൻ കൂടുതൽ സമയമെടുക്കുമെന്ന് ഗതാഗത സെക്രട്ടറി സീൻ ഡഫി വ്യക്തമാക്കി.

ഫ്ലൈറ്റ് ട്രാക്കിങ് വെബ്സൈറ്റായ ഫ്ലൈറ്റ് അവെയറിന്റെ കണക്കനുസരിച്ച് പതിനായിരത്തിലധികം വിമാന സർവീസുകളെ പ്രതിസന്ധി ബാധിച്ചു. ആയിരക്കണക്കിന് സർവീസുകൾ വൈകുകയും നിരവധി വിമാനങ്ങൾ റദ്ദാക്കുകയും ചെയ്തു. വിമാനത്താവളങ്ങളിൽ യാത്രക്കാരുടെ നീണ്ട നിരയും ആശയക്കുഴപ്പവും അനുഭവപ്പെട്ടു.

തകരാറിന് കാരണം ടെലികമ്യൂണിക്കേഷൻ ശൃംഖലയിലെ താൽക്കാലിക തടസ്സമാണെന്നാണ് എഫ്എഎയുടെ വിശദീകരണം. ഇത് സൈബർ ആക്രമണമാണെന്നതിന് തെളിവുകളൊന്നുമില്ലെന്ന് ആഭ്യന്തര സുരക്ഷാ സെക്രട്ടറി മാർക്ക്‌വെയ്ൻ മുള്ളനും വ്യക്തമാക്കി. പഴക്കംചെന്ന വ്യോമഗതാഗത നിയന്ത്രണ സംവിധാനങ്ങളുടെ ശേഷിയും വിശ്വാസ്യതയും സംബന്ധിച്ച ആശങ്കകൾ സംഭവത്തോടെ വീണ്ടും ചർച്ചയായിട്ടുണ്ട്.

2001 സെപ്റ്റംബർ 11ലെ ഭീകരാക്രമണത്തിനുശേഷം രാജ്യവ്യാപകമായി വിമാനങ്ങളുടെ പുറപ്പെടൽ തടയുന്ന രണ്ടാമത്തെ സംഭവമാണിത്. 2023 ജനുവരിയിൽ എഫ്എഎയുടെ കമ്പ്യൂട്ടർ സംവിധാനത്തിലുണ്ടായ തകരാറിനെത്തുടർന്നും സമാനമായ നിയന്ത്രണം ഏർപ്പെടുത്തിയിരുന്നു.