Home Medical കോവിഡ് വാക്‌സിന്‍ ആദ്യമെത്തുക യു.എസില്‍

കോവിഡ് വാക്‌സിന്‍ ആദ്യമെത്തുക യു.എസില്‍

0 second read
0
0
154

ന്യൂയോര്‍ക്ക്:  കോവിഡ് വാക്സിന്റെ സന്തുലിതമായ വിതരണം ഉറപ്പിക്കാന്‍ രാജ്യാന്തര സംഘടനകളും ചില രാഷ്ട്രങ്ങളും ശ്രമിക്കുന്നുണ്ടെങ്കിലും ഫലം കണ്ടേക്കില്ലെന്ന് മുന്നറിയിപ്പ്. കോവിഡിനെതിരായ പ്രതിരോധ കുത്തിവെപ്പ് സമ്പന്ന രാജ്യങ്ങളുടെ ഉപയോഗത്തിനു ശേഷമേ മറ്റു രാജ്യങ്ങള്‍ക്ക് ലഭിക്കൂ എന്ന ആശങ്കയാണ് ഉയരുന്നത്. 2009ലെ സ്വെയ്ന്‍ ഫ്ളൂവിന്റെ കാലത്തും സമാനമായ പ്രതിസന്ധിക്ക് ലോകം സാക്ഷിയായിരുന്നു.
അമേരിക്ക, ബ്രിട്ടന്‍, യൂറോപ്യന്‍ യൂണിയന്‍, ജപ്പാന്‍ എന്നിവര്‍ മാത്രം 130 കോടി ഡോസ് കോവിഡ് 19 പ്രതിരോധ കുത്തിവെപ്പ് ഡോസുകള്‍ ഇപ്പോള്‍ തന്നെ ബുക്കുചെയ്തുവെന്നാണ് ലണ്ടന്‍ ആസ്ഥാനമായുള്ള വിശകലന വിദഗ്ധരായ എയര്‍ ഫിനിറ്റി ചൂണ്ടിക്കാണിക്കുന്നത്. മാത്രമല്ല 150 കോടി അധിക കുത്തിവെപ്പ് ഡോസിന് കൂടി സമ്പന്ന രാജ്യങ്ങള്‍ ശ്രമിക്കുന്നുണ്ട്. സമ്പന്ന രാജ്യങ്ങളുടെ ഈ നീക്കം കോവിഡിനെതിരായ ലോകത്തിന്റെ പോരാട്ടത്തില്‍ വലിയ തോതില്‍ അസമത്വമുണ്ടാക്കുമെന്നാണ് കരുതപ്പെടുന്നത്. കോവിഡ് വാക്സിന് വേണ്ടിയുള്ള വരിയില്‍ ഇപ്പോള്‍ തന്നെ ദരിദ്ര രാജ്യങ്ങളിലെ ജനങ്ങള്‍ ഏറെ പിന്നിലായെന്നും ഇവര്‍ ഓര്‍മിപ്പിക്കുന്നു.
ഓക്സ്ഫോഡിന്റേയും ഫിസര്‍ ബയോഎന്‍ടെക്കിന്റേയും കോവിഡ് പ്രതിരോധ കുത്തിവെപ്പുകളുടെ പരീക്ഷണങ്ങള്‍ അവസാന ഘട്ടത്തിലാണ്. ഇവരുടെ മരുന്നുകള്‍ കോവിഡിനെതിരെ വിജയിച്ചാല്‍ പോലും 100 കോടി ഡോസ് പ്രതിരോധ മരുന്നുകളുടെ നിര്‍മാണം പൂര്‍ത്തിയാവാന്‍ കുറഞ്ഞത് 2022ലെ ആദ്യ പാദം തീരും വരെയെങ്കിലും കാത്തിരിക്കേണ്ടി വരും. ദരിദ്ര രാജ്യങ്ങളിലെ സാധാരണക്കാര്‍ക്ക് പ്രതിരോധ മരുന്ന് ലഭിക്കാന്‍ പിന്നെയും വൈകും.
പ്രതിരോധ കുത്തിവെപ്പ് നിര്‍മാണ സൗകര്യം ആഗോള തലത്തില്‍ വികസിപ്പിക്കുകയെന്നതാണ് ഇതിനൊരു പ്രതിവിധിയായി മുന്നോട്ടുവെക്കപ്പെടുന്നത്. ഇത് മുന്നില്‍ കണ്ട് സനോഫി, ഗ്ലാക്സോ തുടങ്ങിയ മരുന്നു കമ്പനികള്‍ ചേര്‍ന്ന് 2022 ആകുമ്പോഴേക്കും വാക്സിന്‍ നിര്‍മാണം വലിയ തോതില്‍ ആരംഭിക്കാന്‍ ആഗോളതലത്തില്‍ ശ്രമങ്ങള്‍ ആരംഭിച്ചിട്ടുണ്ട്. ലോകാരോഗ്യ സംഘടനയുടെ നേതൃത്വത്തില്‍ മരുന്നു കമ്പനികളുമായി സഹകരിച്ച് 2021 അവസാനമാകുമ്പോഴേക്കും കണ്ടുപിടിക്കാനിരിക്കുന്ന വാക്സിന്റെ 200 കോടി ഡോസ് നിര്‍മിക്കാനുള്ള ശ്രമങ്ങളും ഊര്‍ജ്ജിതമാണ്.
വാക്സിന്‍ തങ്ങളുടെ പൗരന്മാര്‍ക്ക് ഉറപ്പിക്കണമെങ്കില്‍ രാജ്യങ്ങള്‍ക്ക് വാക്സിന്‍ നിര്‍മാണ കമ്പനികളുമായി കരാറുകളുടെ ഒരു പരമ്പര തന്നെ തീര്‍ക്കേണ്ടതുണ്ട്. കൊവാക്സ് എന്ന മരുന്നു കമ്പനിയുടെ ഗവേഷണത്തിന് മാത്രം 78 രാജ്യങ്ങളാണ് താത്പര്യം പ്രകടിപ്പിച്ചിട്ടുള്ളത്. ലോകാരോഗ്യ സംഘടനയുമായി ചേര്‍ന്നു പ്രവര്‍ത്തിക്കുന്ന വാക്സിന്‍ നിര്‍മാണത്തിലാണ് 90ഓളം ഇടത്തരം-ദരിദ്ര രാജ്യങ്ങളുടെ പ്രതീക്ഷ. അപ്പോഴും ചില രാജ്യങ്ങളുടെ കാര്യങ്ങളില്‍ ആശങ്കയാണ്.
അസ്ട്രാസെനേക്ക എന്ന മരുന്നു നിര്‍മാണ കമ്പനിയാണ് ലോകാരോഗ്യ സംഘടനയുടെ ഗാവി പദ്ധതിയുമായി ആദ്യമായി സഹകരിച്ചത്. 30 കോടി കോവിഡ് വാക്സിന്‍ ഡോസുകള്‍ ഈ പദ്ധതിയുടെ ഭാഗമായി നല്‍കാമെന്നാണ് അസ്ട്രാസെനേക്ക അറിയിച്ചിരിക്കുന്നത്. വലിയ തോതില്‍ മുന്നേറിയെന്ന് കരുതപ്പെടുന്ന കോവാക്സ് എന്ന പ്രതിരോധ വാക്സിന്റെ നിര്‍മാതാക്കളായ ഫിസര്‍, ബയോഎന്‍ടെക് എന്നീ കമ്പനികളും ലോകാരോഗ്യ സംഘടനയുടെ പദ്ധതിയില്‍ സഹകരിക്കാനുള്ള താത്പര്യം പ്രകടിപ്പിച്ചിട്ടുണ്ട്.
സനോഫി, ഗ്ലാക്സോ എന്നീ കമ്പനികള്‍ക്ക് 2.2 ബില്യണ്‍ ഡോളാണ് (ഏകദേശം 15,735 കോടിരൂപ) അമേരിക്ക ധനസഹായം നല്‍കുന്നത്. വാക്സിന്‍ നിര്‍മാണത്തിനായുള്ള പരീക്ഷണങ്ങള്‍ വേഗത്തിലാക്കുന്നതിനൊപ്പം വിജയിച്ചാല്‍ 10 കോടി കോവിഡ് പ്രതിരോധ ഡോസുകള്‍ നല്‍കണമെന്നതുമാണ് കരാര്‍. ദീര്‍ഘകാലാടിസ്ഥാനത്തില്‍ 50 കോടി ഡോസുകള്‍ നല്‍കണമെന്ന വകുപ്പും ട്രംപ് ഭരണകൂടത്തിന്റെ കരാറിലുണ്ട്. ഒരു കമ്പനിയുമായി മാത്രമല്ല അമേരിക്കയുടെ കോവിഡ് വാക്സിന്‍ കരാറുള്ളത്. ഫിസര്‍, ബയോഎന്‍ടെക് കമ്പനികളുടെ വാക്സിന്‍ ഗവേഷണത്തിന് 1.95 ബില്യണ്‍ ഡോളറും നൊവവാക്സ് കമ്പനിക്ക് 1.6 ബില്യണ്‍ ഡോളറും അസ്ട്രസെനെക്ക എന്ന കമ്പനിക്ക് 1.2 ബില്യണ്‍ ഡോളറും അമേരിക്ക നല്‍കിയിട്ടുണ്ട്. ഈ കമ്പനികളുടെ ഗവേഷണങ്ങളില്‍ ഏതെങ്കിലും വിജയിച്ചാലും മരുന്നുകള്‍ ആദ്യമെത്തുക അമേരിക്കയിലായിരിക്കും.
സമാനമായ രീതിയില്‍ യൂറോപ്യന്‍ യൂണിയന്‍ കരാറിലെത്തിയിരിക്കുന്നത് സനോഫി ഗ്ലാക്സോയുടെ വാക്സിന്‍ നിര്‍മാണ പദ്ധതിയുമായാണ്. 30 കോടി കോവിഡ് വാക്സിന്‍ ഡോസുകള്‍ നല്‍കണമെന്നാണ് കരാര്‍. കോവിഡ് വാക്സിന്‍ നിര്‍മാണത്തില്‍ പുരോഗതി നേടിയ മറ്റു ചില കമ്പനികളുമായും യൂറോപ്യന്‍ യൂണിയന്‍ സജീവമായി ചര്‍ച്ചകള്‍ നടത്തുന്നുണ്ട്. സാമ്പത്തികമായ വേര്‍തിരിവുകള്‍ മറികടന്നുകൊണ്ട് അര്‍ഹരായ എല്ലാവര്‍ക്കും കോവിഡ് പ്രതിരോധ വാക്സിന്‍ ഉറപ്പിക്കുകയെന്നത് ഒരു പരിധി വരെ അസംഭവ്യമാണെന്ന് ഈ കണക്കുകള്‍ കാണിക്കുന്നു. കണ്ടുപിടിക്കാനിരിക്കുന്ന കോവിഡ് വാക്സിന്‍ ഫലപ്രദമാകണമെങ്കില്‍ ബൂസ്റ്റര്‍ ഡോസുകള്‍ നല്‍കേണ്ടി വരുമെന്ന മുന്നറിയിപ്പുകളും ആശങ്കയെ വര്‍ധിപ്പിക്കുന്നുണ്ട്.

Load More Related Articles
Load More By GinsJaiHind
Load More In Medical

Leave a Reply

Your email address will not be published. Required fields are marked *

Check Also

നിങ്ങള്‍ എന്നെ ഒരുപാട്‌ പ്രചോദിപ്പിച്ചു…

അമേരിക്കന്‍ മനുഷ്യാവകാശപ്രവര്‍ത്തകന്റെ വിടവാങ്ങല്‍ ലേഖനം അമേരിക്കയിലെ അറിയപ്പെടുന്ന ഒരു മന…